ఆంధ్రప్రదేశ్ విభజనకు లోక్‌సభ మూజువాణి ఓటుతో ఆమోదముద్ర

ఫిబ్రవరి - 18,2014

¤   ఆంధ్రప్రదేశ్ విభజనకు లోక్‌సభ మూజువాణి ఓటుతో ఆమోదముద్ర వేసింది. మధ్యాహ్నం 3 గంటల నుంచి 4.20 వరకు జరిగిన చర్చ సందర్భంగా కేంద్ర ప్రభుత్వం ప్రతిపాదించిన 38 సవరణలకు అధికార, ప్రతిపక్షాలు రెండూ సంపూర్ణ మద్దతు పలికాయి. దీంతో బిల్లు ఆమోదం సులువయింది.    »   కేంద్ర హోం మంత్రి షిండే, ప్రధాన ప్రతిపక్ష నాయకురాలు సుష్మా స్వరాజ్, కేంద్ర మంత్రి జైపాల్‌రెడ్డి మాత్రమే పాల్గొన్న చర్చ 20 నిముషాల్లోనే ముగిసింది. ఆ తరువాత గంటపాటు షిండే, ఎంఐఎం అధ్యక్షుడు అసదుద్దీన్ ఒవైసీ, తృణమూల్ కాంగ్రెస్ సభ్యుడు సౌగత్‌రాయ్‌లు ఇచ్చిన సవరణలు మాత్రమే సభ ముందుకొచ్చాయి. ఇందులో షిండే ప్రభుత్వం తరఫున ప్రవేశపెట్టిన 38 సవరణలు సభామోదం పొందాయి. మిగతా ఇద్దరు సభ్యులు చేసిన సవరణలన్నీ వీగిపోయాయి.